پاکستان میں مقیم لاکھوں افغان مہاجرین میں ایک بھی شخص کرونا وائرس سے متاثر نہیں ہوا

پاکستان میں مقیم لاکھوں افغان مہاجرین میں ایک بھی شخص کرونا وائرس سے متاثر نہیں ہوا

• April 7, 2020, 11:40 pm
• COVID-19
• 102 Views

پاکستان میں افغان سفیر عاطف مشال نے کہا ہے کہ خوش قسمتی سے پاکستان میں رہنے والے افغانوں میں ابھی تک کویڈ 19 کا کوئی رجسٹرڈ کیس نہیں ہے۔ ایک بیان میں عاطف مشال نے کہاکہ ہم صورتحال پر گہری نظر رکھے ہوئے ہیں،تمام لوگ عالمی ادارہ صحت اور حکام کی ہدایات پر عمل کریں۔ افغان سفیر نے کہاکہ حکومت پاکستان اور اقوام متحدہ کے ادارہ برائے مہاجرین کے تعاون پر شکر گزار ہیں۔
دوسری جانب منگل کے روز ملک میں کرونا وائرس کے 251 نئے کیسز رپورٹ ہوئے، جس کے بعد مجموعی تعداد 4 ہزار سے تجاوز کر گئی ہے۔ منگل کے روز ملک میں کرونا وائرس کے 3 مریض بھی جاں بحق بھی ہوگئے، جس کے بعد اموات کی کل تعداد 54 ہوگئی۔ مزید بتایا گیا ہے کہ منگل کے روز پنجاب میں 86 کیسز، سندھ میں 54 کیسز، خیبرپختونخوا میں 95 کیسز، بلوچستان 12، کشمیر 3 اور اسلام آباد میں ایک کرونا کیس رپورٹ ہوا۔
پنجاب میں کرونا وائرس کیسز کی مجموعی تعداد 2004 ہوگئی ہے اور اموات کی تعداد 15 ہے۔ سندھ میں کیسز کی مجموعی تعداد 986 ہوگئی جب کہ اموات کی تعداد 18 ہوگئی ہے۔ خیبرپختونخواہ میں اب تک 500 کیسز اور 17 اموات رپورٹ ہوئی ہیں۔ بلوچستان میں 204، گلگلت بلتستان میں 211، اسلام آباد میں 83 اور آزاد کشمیر میں 18 کیسز رپورٹ ہوئے ہیں۔ اس صورتحال میں معاون خصوصی برائے صحت ڈاکٹر مرزا نے کہا ہے کہ پاکستان میں کرونا وائرس سے اموات کی شرح 1.4ہے، پاکستان میں اب تک 54 افراد انتقال کرچکے ہیں، جبکہ کورونا کے تشویشناک 28 مریض ابھی بھی آئی سی یو میں ہیں۔
ملک میں429 افراد مکمل طور پرصحت یاب ہوچکے ہیں۔ مستقبل میں کرونا کی کٹس لاکھوں میں دستیاب ہوں گی۔ جبکہ مستقبل میں لیبارٹریز کی تعداد 32 اور پھر40 تک لے جائیں گے۔ ملک میں اس وقت 18 لیبارٹریز ہیں جو کرونا وائرس کے پی سی آرٹیسٹ کرسکتی ہیں۔