اللہ تعالیٰ کا شکر ہے تندرست ہوگیا ہوں، اسپیکر قومی اسمبلی اسد قیصر

اللہ تعالیٰ کا شکر ہے تندرست ہوگیا ہوں، اسپیکر قومی اسمبلی اسد قیصر

• May 17, 2020, 8:23 pm
• COVID-19
• 160 Views

اسپیکر قومی اسمبلی اسد قیصر نے کہا ہے کہ میں اور میرے بچے الحمدللّٰہ کورونا وائرس سے ٹھیک ہوگئے ہیں، اللّٰہ کا شکر ادا کرتا ہوں کہ جس امتحان میں اللّٰہ نے ڈالا تھا اس سے مجھے نکالا۔

اپنے ایک بیان میں اسپیکر قومی اسمبلی نے مزید کہا کہ جس طرح قوم نے میرے لیے دعائیں کیں اور محبت کا اظہار کیا اس پر شکریہ ادا کرتا ہوں۔

انہوں نے یہ بھی کہا کہ میں نےبہت نزدیک سے سب کچھ دیکھا ہے، مجھے اندازہ نہیں تھا، ہم سب کا ایمان ہے کہ ہمیں ایک دن جانا ہے۔

ان کا کہنا تھا کہ میں نے اس قدر نزدیک سے یہ سب دیکھا کہ احساس قوی ہوگیا کہ ہم سب کوجانا ہے، ہمیں تیاری کرنا ہے اور تیاری صرف مخلوق خدا کی خدمت ہے۔

اسپیکر اسد قیصر نے مزید کہا کہ انسان کو دوسرے کی خدمت سے ملنے والی خوشی بنیادی ہوتی ہے، آئیں ہم سب اپنے لوگوں کے لیے اپنے ملک کے لیے کام کریں، غریب، لاچار اور کمزور طبقات کے لیے کام کریں، مجھ سے کوئی کوتاہی ہوئی ہے تو میں معذرت خواہ ہوں، بطور قوم ہم حالات کا مقابلہ کرسکتے ہیں۔

اسپیکر قومی اسمبلی کا کہنا تھا کہ یہ مشکل مرحلہ تھا، مشکل اس لیے کہ اس کی احتیاطی تدابیر بہت ضروری ہیں، پتہ نہیں آپ کے ارد گرد اس وقت کون کیریئر ہے اور کون انفیکٹڈ ، حکومت کی بتائی گئی احتیاطی تدابیر پر سختی سے عمل کریں۔

انہوں نے کہا کہ میرا 22 دن کا دورانیہ رہا، اب بھی میں دس دن کے میڈیکل ریسٹ پر ہوں، دس دن تک کوئی میٹنگ نہیں ہوسکتی، جو احتیاطی تدابیر بتائی جارہی ہیں آپ مہربانی کرکے ان پر عمل کریں، لاک ڈاؤن کی وجہ سے یہ ایک بہت بڑا چیلنج ہے، اس وقت وزیراعظم عمران خان سمجھداری اور ذمہ داری سے اقدامات کر رہے ہیں۔