پاکستان درست سمت میں گامزن ، معاشی اشاریے بھی مثبت
- July 30, 2021, 11:59 am
- Business News
- 178 Views
لاہور : گورنر پنجاب چوہدری محمد سرور کا کہنا ہے کہ وزیر اعظم عمران خان کی قیادت میں نیا پاکستان بن رہاہے ، پاکستان درست سمت میں جا رہاہے ، معاشی اشاریے مثبت ہیں۔
تفصیلات کے مطابق گورنر پنجاب چوہدری محمد سرور سےڈپٹی اسپیکر سرداردوست محمدمزاری کی ملاقات ہوئی ، ملاقات میں گورنر پنجاب نے کہا کہ حکومت پاکستان کوآگےاوراپوزیشن پیچھےلیکرجاناچاہتی ہے، عمران خان بلاتفریق احتساب سےایک انچ بھی پیچھے نہیں ہٹیں گے۔
چوہدری محمد سرور کا کہنا تھا کہ سیاسی مخالفین ملکی ترقی کوبر یک لگانےکیلئےانتشارپیداکرناچاہتےہیں، کرپشن کا خاتمہ، شفاف احتساب ملک وقوم کیلئےلازم ہے۔
پاکستانی معیشت کے حوالے سے گورنر پنجاب نے کہا کہ پاکستان درست سمت میں جا رہاہے،معاشی اشاریے مثبت ہیں، حکومت اداروں کی مضبوطی کے لیے عملی اقدامات کررہی ہے۔
ان کا کہنا تھا کہ وزیر اعظم عمران خان کی قیادت میں نیاپاکستان بن رہاہے، عمران خان بطوروزیراعظم آئینی مدت کا آخری دن بھی مکمل کریں گے، سیاسی مخالفین صبر کے ساتھ عام انتخابات کا انتظار کریں۔
ڈپٹی اسپیکر دوست مزاری نے کہا کہ اپوزیشن کے احتجاج سے حکومت کوکوئی خطرہ نہیں، عوام اپوزیشن نہیں حکومتی بیانیے کے ساتھ کھڑی ہے، پہلی بار حکومت اداروں میں اصلاحات لا رہی ہے۔
