نواز شریف کی فطرت میں وفا نہیں، ثناء اللہ زہری
- August 9, 2021, 1:28 pm
- Political News
- 339 Views
کوئٹہ: سابق وزیر اعلیٰ بلوچستان نواب ثناء اللہ زہری کا کہنا ہے کہ نواز شریف کی فطرت میں وفا نہیں۔
کوئٹہ میں جلسے کے دوران سابق وفاقی وزیر عبدالقادر بلوچ اور سابق وزیر اعلیٰ بلوچستان ثنا اللہ زہری نے اپنے ساتھیوں کے ہمراہ پیپلز پارٹی میں باضابطہ شمولیت کا اعلان کیا۔
جلسے سے خطاب کے دوران بلاول بھٹو زرداری نے کہا کہ نواب ثنااللہ زہری اور عبدالقادر بلوچ سمیت تمام رہنماوں کا شکر گزار ہوں جو پیپلز پارٹی میں شامل ہوئے، بلوچستان کے عوام اور پیپلزپارٹی کا رشتہ تین نسلوں کا ہے، پیپلز پارٹی نے عوام کو روٹی،کپڑا اور مکان دیا، پیپلزپارٹی نے صوبوں کو اٹھارویں ترمیم اور این ایف سی میں حصہ دیا، بلوچستان کا اگلا وزیراعلیٰ ایک جیالا ہوگا، ہم بلوچستان کے مسائل حل کریں گے، ہم بلوچستان کے ہر ضلع میں پہنچیں گے۔ بلوچستان کے عوام ہمارے ساتھ ہیں تو کوئی طاقت ہمارا راستہ نہیں روک سکتی۔
چیئرمین پیپلز پارٹی کا کہنا تھا کہ پی ٹی آئی کی نالائق اور نااہل حکومت میں جگہ جگہ ناانصافی ہورہی ہے، تبدیلی سرکار نے مہنگائی اور بیروزگاری کے علاوہ کچھ نہیں دیا، تبدیلی کا اصل چہرہ سب نے دیکھ لیا ہے۔
’میں بھی جیالا بن گیا‘
جلسے سے خطاب کے دوران ثنا اللہ زہری نے کہا کہ نواز شریف کو کہا تھا کہ ہم نے (ن) لیگ میں شمولیت کا اعلان عزت کی خاطر کیا، ہمیں صرف عزت چاہیے اور کچھ نہیں، نواز شریف نے ہمیں بےعزت کیا تو ہم نے پارٹی چھوڑی، نوازشریف میں وفا نہیں ہے، غلام اسحاق خان سب سے پہلے نواز شریف کا شکار بنے۔
ثنا اللہ زہری نے کہا کہ ہم نے مشکل وقت میں (ن) لیگ کا ساتھ دیا، بلوچستان کے عوام گواہ ہیں ہم نے صوبے میں (ن) لیگ کی حکومت قائم کی، نواز شریف نے جو ہمارے ساتھ کیا امید ہے وہ بلاول بھٹو زرداری نہیں کریں گے۔ میرے والد پیپلزپارٹی میں تھے اور آج میں بھی جیالا بن گیا۔ ایک کارکن کی طرح پیپلز پارٹی میں کام کروں گا، میری خواہش ہے کہ اگلی مرتبہ بلاول بھٹو زرداری وزیر اعظم بنیں۔
’پیپلزپارٹی کو مزید مضبوط کریں گے‘
اس موقع پر عبدالقادر بلوچ نے کہا کہ (ن) لیگ کو ہم نے خیرباد کہہ دیا مسلم لیگ (ن) میں اب کوئی قدآور شخصیت نہیں رہی ، پیپلزپارٹی نے اپنے دور حکومت میں صوبوں کو حقوق دیئے، بلوچستان کو پیپلزپارٹی کی ضرورت ہے، پیپلز پارٹی کے کارکن بڑے محنتی ہیں، پیپلزپارٹی کو بلوچستان میں مزید مضبوط کریں گے، ہمیں بلوچستان سے 12 نشستیں مل سکتی ہیں۔
